Höfundur borðspilsins Sleeping Queens, Miranda Evarts, var aðeins sex ára þegar hún fékk hugmyndina að þessu stórskemmtilega spili. Hún fékk aðstoð frá eldri systur sinni, Madeleine, og foreldrum sínum, Denise og Max, við að gera hugmyndina að veruleika og spilið hefur notið mikilla vinsælda frá því það kom fyrst út árið 2005.

Fjölskyldan tók svo aftur höndum saman og bjó til Sleeping Queens 2: The Rescue! sem byggir á upprunalegu hugmyndinni en bætti þó við nýjum reglum og aðgerðum til að gera spilið enn fjölbreyttara og skemmtilegra.

Bæði spilin eru fyrir átta ára og eldri og eru frábær fjölskylduspil auk þess sem þau henta líka prýðilega til dæmis á spilakvöldið í skólanum eða í frístund.

Pönnukökudrottningin og Maríuerludrottningin eru mættar aftur ásamt vinum sínum. Reglurnar eru aðeins öðruvísi en í fyrri útgáfunni, Sleeping Queens, og nú þarf að bjarga kóngunum frá verulegum vandræðum! Það þarf að passa sig á óargadvergum, sofandi trjám og hinum lævísu skiptinornum og ekki er hægt að treysta um of á riddarana því þeir geta komið ykkur í vandræði ef einhver kastar teningnum og fær dreka. Spilið gengur út á að safna sem flestum stigum um leið og kóngunum er bjargað.

Fyrir 8 ára og eldri
Fjöldi leikmanna: 2-5
Spilatími: 20 mínútur