Það getur verið krefjandi að sameina vinnu og heimili en það eru nokkur atriði sem gera okkur enn fremur kleift að takast á við þær áskoranir. Okkur skortir aðstöðu, plássið er minna og við höfum ekki það sama við höndina og á vinnustaðnum.

Fjögur atriði er vert að hafa í huga þegar vinnan færist inn á heimilið:

1. Vera með vinnusvæði
2. Hafa verkefnalista
3. Skipuleggja vinnudaginn
4. Vera í góðu sambandi

Skilgreint vinnusvæði

Það sem skiptir hvað mestu máli við það að vinna heima er aðstaða. Meðal þess sem A4 býður upp á eru vörur sem hjálpa þér að skapa þitt eigið vinnurými, þar sem þú getur lagt frá þér vinnuna í loks dags.

Nú standa margir frammi fyrir því að þeir eru ekki með aðstöðu heima hjá sér en þurfa að vinna heima. Sumir eru heppnir og eru með skrifstofu heima við en margir þurfa að vinna á eldhúsborðinu. Hvað gerist þegar klukkan er orðin fjögur og fjölskyldulífið á að taka við? Þá viltu ekki vera með vinnuna úti um allt heima hjá þér. Þá er gott að geta tekið dótið til hliðar, sett í bakka og hann upp í hillu.

Mikilvægt er fyrir fólk að viðhalda sinni rútínu eftir fremsta megni. Vera með skilgreint vinnusvæði, vakna og klæða sig í vinnufötin, setja jafnvel á sig varalit ef það er vaninn. Þegar síðan sest er niður á ákveðnu svæði og þá er viðkomandi kominn í vinnuna.

Á skrifborðið heima við

Gerðu verkefnalista

Það er áríðandi að hafa góða yfirsýn yfir daginn og mælum við með því að fólk notist við verkefnalista. Gott er að byrja daginn á að setjast niður með minnisbókina og setja niður þann verkefnalista sem vinna á í yfir daginn. Með þessu næst yfirsýn yfir hvað átti að klárast yfir daginn og hvað kláraðist í raun þann dag.

Skipuleggðu vinnudaginn

Það er gagnlegt að teikna upp daginn svo að tíminn nýtist sem best. Þegar búið er að lista upp verkefnin í minnisbókina er hægt að raða niður deginum: hvað ætla ég að gera fyrir hádegi og hvað ætla ég að gera eftir hádegi. Að sjá fyrir sér daginn brýtur hann upp í smærri viðráðanlegri hluta.

Ekki gleyma samskiptunum

Góð og regluleg samskipti við vinnufélagana eru afar mikilvæg. Til að halda góðum afköstum skiptir auðvitað miklu máli að vera í góðu sambandi. Vera með spjallið opið í tölvunni; alveg eins og þú myndir spyrja vinnufélagann við hliðina á þér og snúa þér að honum, þá geturðu snúið þér að honum á spjallinu. Reglulegir stöðufundir með forritum eins og Teams eða Google Hangout, sjá framan í fólk og bjóða því góðan daginn, stuðla að því að fólk er enn hluti af teymi þó það sitji ekki við hlið við hlið.

Aðstaðan heima við

Í lok dags

Skýr skil milli einkalífs og vinnu

Á tímum sem þessum er áríðandi að hugsa vel um sjálfan sig og aðra, bæði andlega og líkamlega. Brjótum upp daginn, förum í stutta göngutúra og fáum okkur ferskt loft.

Það er ekki öllum gefið að vinna heima hjá sér í lengri tíma og við viljum ekki að heimilið verði vinnustaður allan sólarhringinn. Þegar þú missir þennan verknað, að fara heim eftir vinnu og setjast upp í bílinn til að keyra heim, þá glatarðu þessum mörkum sem skilja að vinnu og einkalíf og það getur verið erfitt að sleppa vinnunni.

Það getur því reynst mörgum hægara sagt en gert að ljúka vinnudeginum. Fólk stendur upp frá tölvunni á matarborðinu þegar klukkan er orðin fimm og færir sig tvo metra til að undirbúa kvöldmatinn. Í stað þess að ýta dótinu bara til hliðar og koma fjölskyldunni fyrir við matarborðið er betra að setja vinnudótið í bakka og upp í hillu.