Heimanám er þýðingarmikill þáttur í skólagöngu barna; það er mikilvægt að halda því við sem hefur verið lært í skólanum og byggja upp sterkar námsvenjur sem fylgja börnunum í framhaldsnám og út í lífið.

Foreldrar og aðrir uppalendur vita að heimanám er þó ekki alltaf ofarlega á vinsældalistanum og það getur verið erfitt að setjast niður og hefjast handa. Það getur líka gengið illa að halda einbeitingunni og þá er jafnvel stutt í ergelsið.

Ýmislegt er hægt að gera til að auðvelda sér vinnuna og gera hana jafnvel skemmtilega því heimanámið þarf ekki að vera kvöl og pína! Hér eru nokkur atriði sem hafa reynst okkur hjá A4 vel þegar kemur að því að aðstoða börnin við heimanámið.

Ákveðið þau verkefni sem þarf að klára, stundum er gott að skipta stærri verkefnum niður í smærri einingar. Róm var ekki byggð á einum degi og ef til vill þarf ekki að klára allt heimanámið á einu bretti.

Tímavaki er frábært hjálpartæki til að setja sér tímamörk og það hjálpar oft að sjá sjónrænt hvað tímanum líður. Þannig er til dæmis hægt að ákveða að sitja við heimanámið í 25 mínútur áður en tekið er stutt hlé og svo haldið áfram. Tímavaki getur hjálpað barninu að halda einbeitingu og komið í veg fyrir þreytu.

Í dag eru spjaldtölvur mikið notaðar í námi barna og það getur verið mikið álag á háls og hnakka að horfa niður á skjáinn. Til að koma í veg fyrir slíkt álag, og jafnvel stoðvandamál síðar á lífsleiðinni, er gott að nota spjaldtölvustand þar sem skjárinn er þá í augnhæð. Sama er að segja um símann. Ef verið er að vinna við tölvuskjá eru skjásíur sem koma í veg fyrir augnþreytu, ómissandi.

Þá eru vönduð ritföng mikilvæg. Til dæmis eru blýantar og litir með þríhyrndu gripi einstaklega góðir þar sem þeir bæði tryggja rétt grip og barnið þreytist síður í hendinni við að skrifa. Sumum hentar líka vel að vera með svokallað pennagrip, sem sett er fremst á blýant eða penna.